1977 ജനുവരി 12-ന്, കൊച്ചി ഭദ്രാസനം മെത്രാപ്പോലീത്തയായിരുന്ന പുണ്യശ്ലോകനായ ഗീവർഗീസ് മാർ ഗ്രിഗോറിയോസ് ... തിരുമേനി (പെരുമ്പിള്ളി തിരുമേനി) പരിശുദ്ധ ദൈവമാതാവിന്റെ നാമത്തിൽ ദേവാലയം കൂദാശ ചെയ്ത് വിശുദ്ധ കുർബാന അർപ്പിച്ചു. തുടർന്ന് 1978-ൽ സൺഡേ സ്കൂളും, 1981-ൽ മർത്തമറിയം വനിതാ സമാജവും ഔദ്യോഗികമായി പ്രവർത്തനം ആരംഭിച്ചു.
ഇടവകാംഗങ്ങളുടെ വർധനവിനെ തുടർന്ന് ദേവാലയം വിപുലീകരിക്കേണ്ടതിന്റെ ആവശ്യകത ഉയർന്നു. 1992 ജനുവരി 15-ന് പുതിയ ദേവാലയ നിർമ്മാണം ആരംഭിക്കുകയും, വിശ്വാസജനങ്ങളുടെ നിർലോഭമായ സഹായവും അഹർനിശ പ്രാർത്ഥനയും കഠിനാധ്വാനവും ഒരുമിച്ച് ചേർന്ന് ഇന്നത്തെ മനോഹരമായ ദേവാലയം സാക്ഷാത്കരിക്കപ്പെടുകയും ചെയ്തു. 1995 മെയ് 8, 9 തീയതികളിൽ അഭിവന്ദ്യ ജോസഫ് മാർ ഗ്രിഗോറിയോസ് തിരുമേനിയുടെ മുഖ്യകാർമികത്വത്തിൽ ദേവാലയ കൂദാശ ഭക്തിപൂർവ്വം നടത്തപ്പെട്ടു
1999-ൽ സഭയുടെ ധീര രക്തസാക്ഷിയായ മോർ ഇഗ്നാത്തിയോസ് നൂറോനോയുടെ നാമത്തിൽ യൂത്ത് അസോസിയേഷൻ രൂപീകരിക്കപ്പെട്ടു. തുടർന്ന് കൽക്കുരിശ്, കുരിശുംതൊട്ടി, കാൽനട തീർത്ഥയാത്ര തുടങ്ങിയ ആത്മീയ പ്രവർത്തനങ്ങൾ ഇടവകയുടെ വിശ്വാസജീവിതത്തിന് പുതുശക്തി പകർന്നു. 2012 മുതൽ എല്ലാ വർഷവും ഒക്ടോബർ ഒന്നിന് പരിശുദ്ധ എൽദോ മോർ ബസേലിയോസ് ബാവയുടെ കബറിങ്കലേക്കുള്ള പൂതംകുറ്റി മേഖലയുടെ കാൽനട തീർത്ഥയാത്ര ഈ ഇടവകയിൽ നിന്നാണ് ആരംഭിക്കുന്നത്
1976-ൽ ഏകദേശം മുപ്പത് കുടുംബങ്ങളുമായി ആരംഭിച്ച ഈ ഇടവക, ഇന്ന് 72 കുടുംബങ്ങളുമായി ദൈവാനുഗ്രഹത്താൽ സത്യവിശ്വാസം കാത്തുസൂക്ഷിച്ചുകൊണ്ട് സഭയുടെ ആത്മീയവും സാമൂഹികവുമായ എല്ലാ മേഖലകളിലും സജീവമായ സാന്നിധ്യമായി വളർന്നു നിൽക്കുന്നു. ഇടവകാംഗങ്ങൾ നൽകിയ ചെറുതും വലുതുമായ സഹായങ്ങളും അവർ സഹിച്ച ത്യാഗങ്ങളുമാണ് ഈ വളർച്ചയുടെ ഉറച്ച അടിസ്ഥാനം.
പരിശുദ്ധ ദൈവമാതാവിന്റെയും സകല പരിശുദ്ധന്മാരുടെയും മധ്യസ്ഥതയിൽ ആശ്രയിച്ച്, സത്യവിശ്വാസ ധീരരായി ഇനിയും മുന്നോട്ട് പോകുവാൻ ദൈവം ഇടയാക്കട്ടെ എന്ന പ്രാർത്ഥനയോടെയാണ് ഈ ഇടവക തന്റെ ദൗത്യം തുടരുന്നത്.
ഇടവകയുടെ പ്രധാന പെരുന്നാൾ എല്ലാ വർഷവും ജനുവരി 14, 15 തീയതികളിൽ ഭക്തിസാന്ദ്രമായി ആഘോഷിക്കുന്നു.